Óvinsælar aðgerðir

Skattahækkanir, bensínhækkanir, niðurskurður til heilbrigðismála - skemmtileg jólagjöf stjórnvalda til þjóðarinnar. 

Auðvitað verður að grípa til aðgerða í ljósi ástandsins - en þetta ástand - hver er að svara til saka fyrir það? Við "pöpulinn" á Íslandi??? En hvar eru hinir eiginlegu sökudólgar - þeir sem settu okkur á hausinn??? Eru þeir enn að leita að götum í kerfinu í útrásarleit sinni fyrir græðgina?  Það er ljóst að eftirlitskerfið okkar er enn eitt hriplekt gatasigti.. og fjárglæframennirnir eru eins og verstu tölvuhakkarar, þeir þekkja leiðir sem venjulegir viðskiptafræðingar, lögfræðingar og hagfræðingar skilja ekki.  Seðlabankinn og Fjármálaeftirlitið þurfa sennilega að ráða útrásarvíkingana í vinnu til sín til að láta þá kenna sér klækina til að einhver möguleiki sé á því að þétta eftirlitsnetið.

Mig langar til að farið verði að tala við þjóðina eins og hún sé ekki fífl!!! Ég hefði vilja hlusta á Göran Persson sem telur það lykilatriði að þjóðinni sé sagt satt og að hún sé upplýst um stöðu mála og kerfið sé gert það gegnsætt að það skiljist og það megi gagnrýna það.  Ég er nefnilega innilega sammála Persson í því að fólk er miklu tilbúnara til að taka á sig skell ef það veit nákvæmlega hvers vegna.  Mér finnst vitlaus skilningur fólginn í því að ekki megi segja almenningi frá stöðu mála fyrr en allt liggur á borðinu, mér finnst ákveðið óöryggi fólgið í því hjá stjórnmálmönnum að halda að vald manns verði meira ef maður býr einn yfir vitneskjunni. Valdið er fólgið í því að segja frá stöðunni á mannamáli og viðurkenna að ekki séu öll kurl komin til grafar og enn megi vænta breytinga.  Fólk vill láta tala við sig af virðingu og á jafnréttisgrundvelli og það eiga stjórnvöld að virða.

En nú er best að reyna að skrifa um stærðfræði og skóla án aðgreiningar, og sambandið á milli þessara tveggja þátta, á mannamáli svo ég geti farið að skrifa á jólakortin

Öðruvísi aðventa

Sit við eldhúsborðið mitt með bolla af góðu kaffi og horfi á jólaskreytt húsin í nágrenninu - jólaljósin eru yndisleg í kolsvörtu skammdeginu. Er ánægð með að hafa drifið mig í frábæran spinningtíma hjá Dandý í morgun, þann næstsíðasta þetta árið.

Það er svolítið skrýtið að vera í skóla aftur eftir margra ára hlé og vera á haus í verkefnavinnu á þessum árstíma - ég verð að viðurkenna að mig langar meira til að vera að skrifa jólakort og baka - en efni verkefnisins er áhugavert og skemmtilegt, svo það þarf bara aðeins að skerpa einbeitinguna til að ljúka verkinu og það verður örugglega frábært að tölta með umslagið á pósthúsið þann 15. des og vera komin í jólafrí.

Í dag er svo fyrri umræða um fjárhagsáætlun Fljótsdalshéraðs í bæjarráði - það er búið að leggja óhemju mikla vinnu í að ná henni þannig að allir séu þokkalega sáttir, svona miðað við aðstæður, en óvissuþættirnir eru margir - hvernig má annað vera þegar fjárlög liggja ekki einu sinni fyrir....

Fleiri verkefni bíða fram að jólum í pólitíkinni - mér sýnist næsta vika vera að verða talsvert ásett, en öll þessi verkefni eru spennandi og nógur tími eftir 19. des til að baka og þrífa. 

Það verður yndislegt að fá stóru stelpuna og ömmustelpuna heim rétt fyrir jólin og svo kemur mamma austur á Þorláksmessu - það er svo gott að geta haft þá sem manni þykir vænst um hjá sér á hátíðisdögum.

En nú er best að lesa og skrifa svolítið um það hvers vegna stærðfræðin er að valda krökkum vandræðum... 

 Varð að setja inn eina mynd af jólastelpunni minni.

Útsvarsliðið okkar er snillingatríó

Mikið er ég hreykin af útsvarsliðinu okkar, þau eru skemmtileg og snjöll.  Til hamingju krakkar og takk fyrir að vera svona frábær - þið eruð Fljótsdalshéraði til sóma.

Það er mikið um að vera hjá mér í dag. Jólamarkaður í Sláturhúsinu þar sem ég ætla að slá tvær flugur í einu höggi og vera Soroptimisti í fjáröflun og körfuboltastelpumamma í stuðningsliði í fjáröflun. Soroptimistar selja kærleikskúlur og hreindýrakæfu en körfuboltastelpurnar selja leikföng og kannski eitthvað fleira.

Síðan fæ ég að borða með menntaskólakennurunum í kvöld - þó ég sé í orlofi - einhverjir ætla að elda í dag og aðrir koma með eitthvað, held að bæði matur og félagsskapur verði af mestu gæðum.

Fram að sölumennskunni ætla ég að kíkja aðeins í Ketilsstaði til Elsu og reyna að ljúka við eitt verkefni sem ég var að fá til baka með athugasemdum.

Pólitíkin verður ekki í aðalhlutverki um helgina - en eftir helgi þarf að bretta upp ermar og ganga frá gögnum fyrir fyrri umræðu um fjárhagsáætlun sem er nú farin að fá á sig mynd - kannski ekki fulla af broskörlun en raunhæfa mynd miðað við aðstæður.

Samræming

Stundum finnst mér það vera mitt aðalverkefni að samræma vinnu/nám/pólitík og einkalífið. Veit að ég er ekki ein um þá skoðun.  Upplifði tvö svona dæmi í gær þegar ég lét þvottavélina væla því ég var niðursokkin í að setja upp grind að verkefni - en hef mun oftar hlaupið frá náminu í þvottinn... Í gærkvöldi stakk ég svo af áður en bæjarstjórnarfundi lauk því ég var búin að lofa örverpinu mínu að fara með henni á spilakvöld í skólanum... stundum finnst mér þessi stöðugu skiptingar þreytandi, langar bara til að geta einbeitt mér algerlega að einu verkefni... en á maður ekki bara að vera þakklátur fyrir að hafa heilsu og orku í mörg verkefni.

Við spiluðum félagsvist í gærkvöldi, 13 ára unglingarnir virtust skemmta sér konunglega með foreldrunum, spilakvöld virðist vera svona pabbaverkefni því mikill meirihluti foreldranna var karlkyns aldrei þessu vant á foreldrakvöldi. Skemmtilegt að leika hlutverk bæði pabba og mömmu í lífi stórskemmtilegs unglingsins míns. Krakkarnir voru kurteis og skemmtileg og virðast njóta þess að gera eitthvað með fullorðna fólkinu, þurfum að gera meira svona.

Í dag liggur fyrir að drífa sig í ræktina í smástund, fara síðan að vinna verkefni um stærðfræðierfiðleika og skreppa síðan á málþing um unglinga í menntaskólanum síðdegis. Ætla svo að byrja að skrifa á jólakortin í kvöld með tilheyrandi jólatónlist, sherrydrykkju og kertaljósum.

Ég reyni að stilla mig í pirringi mínum yfir nýjustu yfirlýsingum Davíðs Oddssonar um sárasakleysi sitt í efnahagsástandi þjóðarinnar og hugsanlegri endurkomu sinni í pólitík. Skyldu sjálfstæðismenn enn elska hann og dá og vilja hann aftur inn í stjórnmálin??

Sparnaður hjá ríkisútvarpinu

Mér finnst afar sérstök sparnaðartillaga hins ofurlaunaða útvarpsstjóra um að hætta útsendingum svæðisstöðvanna á landsbyggðinni. Hér fyrir austan standa þessar útsendingar undir sér vegna auglýsingatekna. Þannig að sparnaðurinn er í raun neikvæður  - útgjaldaaukning! Þegar verið er að spara eða skera niður þarf nefnilega að vanda sig...

Sit heima og læri og hlusta á ljúfa jólatónlist - búin að senda frá mér drög að tveimur verkefnum í dag, fæ þau aftur í hausinn en ákveðnum áfanga er samt náð.  Nú er bara eitt verkefni eftir, stórt og mikið en - bara eitt....

Ætla að skella mér í Bodypump 17:10, ef ég næ því - þarf aldrei þessu vant að heimsækja heilsugæslustöðina. Örverpið er með meinsemd í tá - allt orðið rautt, heitt og bólgið - eitthvað þarf að gramsa þarna sýnist mér. Gott að hún er orðin svo stór að það er hallærislegt að skæla .

Fyrsti sunnudagur í aðventu

Aðventustjakinn er kominn á sinn stað með nýjum kertum og kveikt verður á kertinu með ákveðinni viðhöfn á eftir.  Það er svo sannarlega jólalegt á Héraðinu núna. Það voru mikil viðbrigði að koma út úr flugvélinni í gær, marautt í Reykjavík en talverður snjór hér.  Færðin hér er hálfleiðinleg, laus snjór ofan á talsverðri hálku, svo maður lendir auðveldlega í vandræðum ef farið er út af aðalleiðunum. Ég er hrædd um að snjómoksturinn hér hafi lent í einhverju uppnámi við fráfall Malarvinnslunnar, þarf að kynna mér það mál á mánudaginn.

Er búin að vera í borginni í rúma viku, í skólanum og aðeins í pólitíkinni. Það var mikið að gera í skólanum, enda síðustu staðlotur á önninni og verið að ljúka verkefnum í öðrum kúrsinum og undirbúa lokaverkefni í hinum.  Það er frábært að fá tækifæri til að kynnast nýju fólki og nýjum hugmyndum í gegnum þetta nám, maður er ríkari eftir en áður.  Nú þarf bara að bretta upp ermar og vinna ákveðið að því að ljúka því sem eftir er fyrir 15. desember. Reykjavík er frábær með öllu því yndislega fólki sem maður á þar og Héraðið er yndislegt því þar eru yngri börnin mín, heimilið mitt, vinir og kunningjar og mikið af spennandi viðfangsefnum.

Í dag stendur til að halda áfram að koma heimilinu á réttan kjöl eftir langa fjarveru mömmunnar, setja upp jólagardínur í eldhúsinu, baka tvær sortir af smákökum og elda svo kjötsúpu í kvöld. Berglind Rós stjórnar aðgerðum, hún er komin í mikið jólaskap, er búin að pakka inn einhverju af jólagjöfum, spilar og syngur jólalögin og þráir að farið verði að baka eitthvað...

Á morgun tekur svo pólitíkin við af fullum þunga - þar þarf ég að setja mig inn í ýmislegt aftur eftir vikufjarveru, ljúka þarf fjárhagsáætlanagerð og ýmsu öðru fyrir jól...

 

Orðræðugreining og fleira spennandi

Að vera spurður að því klukkan 17, eftir talsvert krefjandi dag, hvernig orðræðugreining geti nýst í rannsóknarvinnu og vettvangsvinnu er svo ögrandi að það er ekki hægt annað en að vera með.... Í starfi með fólk og í rannsóknum í þágu fólks þarf að vera stöðugt á tánum til að gæta hagsmuna allra og meðvitund um orð og orðnotkun skiptir miklu máli.  Skilja þarf samhengi og afleiðingar orðræðunnar til að bregðast rétt við og skilja "rétt"...

Mér líkar orðræða Guðrúnar Helgadóttur alltaf jafnvel.  Hakkaði í mig nýju bókina hennar "Bara gaman" í nótt.  Lýsingar hennar á krökkum og samskiptum þeirra eru alltaf jafn hlýjar en jafnframt drepfyndnar. Tumi stóribróðir (9ára) skríður reglulega uppí til Vildísar (8 ára) til að fá "skrifta" og fá "syndaaflausn" til að geta sofið vært. Tumi reynir að finna nýjan mann handa mömmu en Vildís hefur meiri áhyggjur af því hvað vinir Tuma borða mikið, svo hún felur ostinn sem er svo dýr og lætur þá borða sultu ofan á brauðið - með svolítið samvískubit yfir afleiðingum á tannheilbrigði þeirra....

Ástandið - 17% verðbólga með tilheyrandi óafturkræfri hækkunr íbúðalánahöfuðstóla sem því nemur.  Afar alvarlegt mál fyrir nánast allar fjölskyldur landsins.  Ég skil ekki alveg af hverju ekki er lögð ofuráhersla á að finna leið út úr þessum vítahring - slíkt myndi sýna svo ekki verður um villst að verið er að vinna að lausnum.

Aðalskipulag Fljótsdalshéraðs

Á sjö tíma bæjarstjórnarfundi í gær var fyrsta Aðalskipulag sameinaðs Fljótsdalshéraðs afgreitt til Skipulagsstofnunar.  Hefði aldrei trúað því að óreyndu hversu pólitísk og skemmtileg skipulagsmál eru.  Þokkaleg eining er í bæjarstjórninni um skipulagið, en Þéttbýlið við Fljótið og skipulag þess er þó umdeilt, sumir vilja halda áfram að byggja Egilsstaði til suðurs og í Fellum til norðurs en meirihlutinn hefur frá upphafi viljað sameina byggðakjarnana við Fljótið eins og hægt er miðað við að á milli þeirra er Egilsstaðabýlið, flugvöllurinn og Fljótið! Meirihlutinn vill því skipuleggja byggð í framtíðinni í landi Eyvindarár með tilheyrandi nýrri og spennandi leið um Melshorn og nýrri brú á Eyvindará sem sameinar hverfi beggja megin árinnar.

Get ekki neitað að á síðustu metrum fundarins var ég farin að fylgjast með því á vefmiðlum hvernig gengi með afgreiðslu IMF á lánsumsókn okkar, og mikill léttir fylgdi því að sjá að hún fékk jákvæða afgreiðslu og að í kjölfarið er ljóst að nágrannar okkar munu lána okkur það sem upp á vantar til að fylla upp í gatið stóra. Vonandi þýðir þetta það að hægt er að fara að taka einhverjar ákvarðanir um fjárlög ríkisins og hvað ríkið er að fara að gera á næstunni.

Það var gott að koma heim um ellefuleytið og hitta englabossann og gelgjuna. Englabossinn er búinn að vera lasinn og því meira heima en oft annars og litlu systur hans finnst greinilega fínt að hafa hann nálægt.  Það vill reyndar svo heppilega til að við mægður erum samstíga í því að eiga langa miðvikudaga, ég á fundum og hún í söngtíma, á körfuboltaæfingu og í æskulýðsfélagi kirkjunnar. Sófinn er því gjarnan bældur á miðvikudagskvöldum þegar allir eru komnir heim.

Jólin nálgast - það eru komin aðeins jólaljós í gluggana hjá okkur og í gærkvöldi voru valdar myndir af englabossanum með hvíta kollinn í jólakortið og til stækkunar í einhverja jólapakka. Það er kominn jólahugur í okkur mæðgur - karlmanninum á heimilinu finnst við nú svolítið snemma í því..., Það verður yndislegt að fá þær mæðgur, Guðbjörgu Önnu og Karen Rós, og Torfa til okkar um jólin. Jólin eru tími sem mann langar til að hafa þá hjá sér sem standa hjarta manns næst.

Í dag gefst vonandi tóm til að stunda námið af kappi - bara tveir fundir skráðir í dagbókina í dag og öðrum má sleppa ef vill...

Egilsstaðir - Reykjavík - Egilsstaðir - Reykjavík - Egilsstaðir

Ritstífla hefur verið að hrjá mig undanfarið - svo nú verður skrifað í yfirlitsstíl til að rekja það helsta sem á daga mína hefur drifið og hvað er framundan.

Yfirlit síðustu viku:

• Konukvöldið var fínt - var samt ekki til enda, kannski aðeins að eldast...
• Fjárhagsáætlanagerðin gengur sinn vanagang - það er gott að finna að allir eru tilbúnir til að vinna saman að sparnaði og hagræðingu.
• Fjármálaráðstefnan var ágæt - sambandið var með ágætar upplýsingar, fjármálaráðherra talaði töluvert en sagði lítið, ráðherra sveitarstjórnarmála sagði mun meira - en auðvitað hefðum við viljað fá enn skýrari skilaboð. Dr Gylfi Zöega hagfræðingur og prófessor var frábær, hann sagði mikið, var útskýrandi, mannlegur og skemmtilegur - hér eftir mun ég alltaf sperra eyrun þegar hans er getið í fjölmiðlum.  Það er auðvitað gott að hitta aðra sveitarstjórnarmenn sem eru í svipuðum sporum og maður sjálfur og bera bækur sínar saman við þeirra bækur.
• Námið gengur bara ágætlega - ég notaði tækifærið þegar ég var í bænum í vikunni og hitti hópinn minn í kenningakúrsinum, við hittum leiðsagnarkennarann okkar og komumst að því að við værum langt komnar með lokaverkefnið okkar - við unnum vel í tvo tíma og nú vantar bara rétt herslumuninn sem verður gerður þegar við hittumst næst 24. og 25. nóv. Ég hitti líka Dóru Bjarnason og námsráðgjafa til að skipuleggja framhald námsins míns.
• Svo var haldið upp á fimmtugsafmælið hennar Rannveigar á laugardagskvöldið, glæsileg veisla og skemmtileg. 100 fermetra íbúðin hennar Rannveigar var gerð að veislusal fyrir 70 manns með því að umbreyta bílskúrnum og tjalda yfir hluta af pallinum hennar. Fín veisla með skemmtilegu fólki og frábærum veitingum. Við Gleðikonur tróðum aðeins upp að vanda - fín æfing fyrir 20 ára afmælið 1. mars. Rannveig á afmæli í dag - til hamingju með það vinkona.

Verkefni næstu daga

• Fundur með þingmönnum kjördæmisins eftir hádegi í dag.
• Bæjarstjórnarfundur á miðvikudaginn þar sem nýtt aðalskipulag verður vonandi afgreitt.
• Áframhaldandi vinna að fjárhagsáætlun, 1. umræða í bæjarráði í næstu viku.
• Lærdómur m.a. undirbúningur að útvarpsþætti um skóla án aðgreiningar
• Heimilisstörf og fjölskylduspjall
• Flokksstjórnarfundur á laugardag og námslota í næstu viku

Skemmtileg fjölbreytni í verkefnum og nóg að gera, fer enn í hlutverk Pollýönnu og þakka fyrir að vera hraust og virk og geta sinnt mörgum spennandi verkefnum á ýmsum sviðum lífsins.

Konur á Héraði skemmta sér í kvöld

Prúðbúnar konur á öllum aldri munu streyma í Valaskjálf í kvöld um áttaleytið til að skemmta sér saman - Helga Braga ætlar að skemmta okkur - verslanir bæjarins sýna okkur tískuvarning - fyrst og fremst ætlum við að skemmta okkur sjálfar, efast ekki um að hlátrasköll munu fara langt með að lyfta þakinu af húsinu...

Eydis vinkona mína ætlar að koma hingað um sjöleytið svo við getum aðeins samhæft okkur áður en við skellum okkur í slaginn...

Gelgjan mín er búin að samþykkja dressið - fínt að draga fram gamla þorrablótskjóla þegar mikið liggur við..., neglurnar orðnar rauðar og bara eftir að skella smá lit í andlitið og klæðast skrúðanum.

Hlakka til að skemmta mér í kvennafans - það er frábært að skemmta sér með konum -  yndislegt að eiga góðar stundir með elskunni sinni - og gaman að blanda ýmsum hópum saman...

Áhyggjulaus kvöldstund framundan, megið þið eiga gott laugardagskvöld.