Kerfið er þungt í vöfum

Það er erfitt að vera þolinmóður og bíða eftir jafnmikilvægu máli og uppgjöri gömlu bankanna til að hin rauverulega endurreisn bankakerfisisns geti farið af stað.  En um leið þýðir ekki annað en að vanda sig - maður sér að nú er verið að leiðrétta lagafrumvörp vegna þess að asinn hefur verið og mikill í lagasetningunni í verulega góðri trú, en ekki gafst tími á harðahlaupunum til að hugsa allar hliðar til loka.

Bankarnir eru algerlega nauðsynlegir til að halda atvinnulífinu gangandi og tryggja eðlilega veltu í samfélaginu.  Nýju bankarnir virðast starfa þokkalega og vera að veita lán til eðlilegrar uppbyggingar en þetta uppgjör á gömlu bönkunum virðist hanga yfir okkur eins og svart ský og því þarf að blása burtu.

Ég las í gær mjög gott erindi Gunnars Þ. Andersen forstjóra Fjármálaeftirlitsins sem hann flutti á aðalfundi samtaka fjármálafyrirtækja.  Þar er talað á mannamáli og ekkert verið að færa hlutina í sparifötin.

Hann segir íslenska viðskiptalíkanið sem átti að vera svo gott - um miðjan áratuginn - hafi verið eðlisgallað og stærsta gallann telur hann hafa verið hinn sterka útrásaranda sem ekki hafi verið í neinu samhengi við getu íslensks hagkerfis.  Þegar gagnrýnisraddir heyrðust var talað um öfund vegna einstakrar velgengni útrásarvíkinganna okkar. 

Gunnar vitnar í velviljaðan gagnrýnanda sem hafi sagt: " Þið verðið að fara varlega annars verður land gufuorku þekkt sem land gufutals".  Gunnar ræðir líka um hlutverk fjölmiðla sem aðhaldsafls og telur þá algerlega hafa brugðist hlutverki sínu á þessum tímun.  Lokaorð hans eru jákvæð þegar hann telur okkur að ef við lærum af mistökunum munum við fá tækifæri til að byggja upp betra fjármálakerfi, betra hagkerfi og ríkara samfélag. 

Ég sit í viðskiptanefnd þingsins og fæ því tækifæri til að fylgjast vel með viðskiptaumhverfinu og nýsköpun þess á næstu mánuðum - spennandi, því þetta er geiri sem ég þekki ekki neitt en tel einmitt gott að einhverjir slíkir, sem spyrja spurninga og telja það gamla ekki sjálfgefið sitji í þessarri nefnd.

En nú skín sólin á mig hérna í Grafarholtinu og ég ætla aðeins að skoða hana betur í göngu um hverfið núna í morgunsárið og fara síðan í vinnuna og lesa mér enn betur til um hin ýmsu mál sem bíða afgreiðslu.  Eins gott að ég gleymi ekki að hringja í unglinginn minn sem er að fara í próf í samfélagsfræði.

Og svo hugsa ég að gestur númer 100.000 kíki inn á þessa síðu í dag!

Tafir á uppskiptingu milli nýju og gömlu valda titringi

Athugasemdir

[Rannveig Árnadóttir (IP-tala skráð) 26.5.2009 kl. 11:21]

Maður hefur það svolítið á tilfinningunni að öll þessi spilling og allt þetta klúður sem við sitjum uppi með sé bara eins og kviksyndi - við sökkvum dýpra og dýpra og það er þrautinni þyngra að komast upp

En þú verður að hafa verðlaun fyrir gest nr. 100.000 gæskan

[Hanna Petra (IP-tala skráð) 26.5.2009 kl. 15:34]

Hæ, hæ! Bara smá kveðja frá litlu systur, sem er smá svekkt núna! Varð gestur nr. 100001 á síðunni þinni! Ætlaði svoleiðis að negla þetta - Jóhanna Herdís kíkti inn á síðuna þína og var nr. 99999 og þá var ég ekki sein á mér - en samt aðeins of sein. Vona bara að viðkomandi hafi tekið eftir því að hann/hún varð sá hundrað þúsundasti!