Þakkarvert að hafa heilsu

Ég var lasin á sunnudag og mánudag, það er afar sjaldgæft að ég mæti ekki í vinnu vegna veikinda, en ég treysti mér ekki í vinnuna á mánudaginn, iður mín voru í uppreisnarhug og vældu ámátlega án þess að vilja endilega selja upp eða niður.... Mætti í vinnu í gær - en var hálfræfilsleg, dreif mig samt með félögum mínum í bæjarstjórninni í heimsókn til kollega okkar á Djúpavogi, sá ekki eftir því, það er gaman að koma á Djúpavog, þar eru menn bjartsýnir og stórhuga og sveitafélagið er í bullandi uppsveiflu.  Gerði mér grein fyrir því að heilsu var náð þegar ilmandi súpa var á borð borin í Hótel Framtíð, ég var svöng og borðaði með bestu lyst.  Í dag dreif ég mig svo í ræktina, vinnuna og á bæjarstjórnarfund þar sem fjárhagsáætlun var til fyrstu umræðu og er ég bara nýkomin heim af maraþonfundi.  Tveir ásteitingarsteinar urðu tilefni mikillar umræðu - boðað eignarnám á landi til tjaldstæðisnota og Sláturhúsið, menningarhús.  Menn skildu þó glaðir og ljóst er að mikil samstaða er um fjárhagsáætlunargerðina í heild sinni og gleður það mig mjög - þetta er jú frumraun mín sem forsvarsmaður í þessari deild.

Karen Rós litla ömmustelpan mín var hjá okkur um helgina, sannkallaður sólargeisli, á yndislegum aldri þar sem málið þroskast dag frá degi, söngtextar eru að lærast og svo fengum við að upplifa það með henni að bleyjan er að hverfa og klósettferðir voru tíðar - allir sem nýttu snyrtinguna þessa helgi voru "dulleg depa".

Mér líður eins og nýhreinsuðum hundi og man sennilega eftir því í nokkra daga að þakka fyrir að vera hraust og hafa fulla starfsorku. Takk, takk, takk....

Athugasemdir

[Sigþrúður Harðardóttir, 28.11.2007 kl. 22:21]

Rétt hjá þér mín kæra, maður þarf stundum áminningu um það að góð heilsa er ekki sjálfsögð. Við höfum alloft undanfarin tvö ár fengið slíkar áminningar þar sem kærir vinir á besta aldri hafa veikst alvarlega.

Ég hef verið heppin eins og þú, hef verið hraust allt mitt líf í raun og veru. Ég bið Guð að gefa mér góða heilsu lengi enn...en ég mætti vera duglegri að hjálpa honum, t.d. með því að borða hollari mat og hreyfa mig meira. Já, í kvöld ætla ég að lofa honum því að vinna verkið með honum :-)

Rétt hjá þér með aldurinn á snúllunum okkar....nú er allt að gerast. Bleian fór í sumar hjá okkur, söngtextarnir rúlla inn og með hverjum deginum bætast við ný og fjölbreytt orð í orðaforðann. Allt í einu , enn einu sinni á ég krakka en ekki smábarn. Það er gaman en það er líka ótrúlega fljótt að gerast!

Og talandi um krakka. Til hamingju með dúlluna sem varð 23 ára þann 24.nóvember!