Hljómfögur danskan

Mikið er gaman að hlusta á dönsku í sjónvarpinu af og til - hin engilsaxnesku yfirráð eru svo yfirgnæfandi í töluðu máli sjónvarpsstöðvanna að það fer sérstakur vellíðunarstraumur um mínar kvartdönsku hljóðhimnur við að heyra sérhljóð í endum orða gleypt og kokað svolítið á errunum.

Er dæmigerð kona í kvöld - vinn verkefni - hlusta á sjónvarpið með einu og einu augnatilliti á skjáinn þegar mér heyrist eitthvað spennandi að gerast.  Fór aðeins fram úr sjálfri mér í þessum margbrotna veruleika og týndi skjali sem ég var að fara að senda - fylltist engri panik því ég hélt að ég kynni algerlega að enduheimta slíkt tjón.   En viti menn þrátt fyrir leiðsögn og allar tiltækar leiðir sem ég þekki finnst skjalið ekki. Örvæntingin var alveg að ná tökum á mér þegar ég fylltist forlagatrú og ákvað að sennilega væri verkefnið bara ekki nógu gott hjá mér - ég þyrfti að skoða það aðeins betur í fyrramálið áður en ég sendi það - og við það róaðist ég og fór aftur að njóta hinnar hljómþýðu dönsku um leið og ég las um lýðræðislegt skólastarf.

Kíki svo af og til á moggavefinn til að fylgjast með því helsta sem er að gerast í efnahagslífinu.  Nú situr Árni Matt með alþjóðagjaldeyrissjóðnum og þreifar á samningsstöðu okkar.  Ég er ekki yfir mig hrifin af því að við leitum aðstoðar þangað - er skíthrædd um velferðarkerfið okkar, menntakerfið  og auðlindirnar.   En það er auðvitað ekki margt til ráða - staðan er ekki björt eins og er... vont þegar maður er alveg búin að missa traustið á þessum körlum sem ýmist tala af sér - eða tala ekkert en fljóta sofandi að feigðarósi.... 

Gæti skrifað langt mál um ábryrgð ríkisins á peningaleik jakkafatastrákanna sem léku frítt spil í skjóli þess að íslenska ríkið skrifaði upp á svo þeir gætu komist enn lengra í leiknum. En það er að koma nótt og ekki rétt að ræna sig friðsælum nætursvefni, ég ætla að reyna að vakna um miðja nótt til að spinna með Dandy og hinum skvísunum.

 

Athugasemdir

[Dandý (IP-tala skráð) 13.10.2008 kl. 15:51]

svo bara mæti ég ekkert í spinning..  vona að ég komi á miðvikudag.. 

[Jón Halldór Guðmundsson, 14.10.2008 kl. 00:25]

Ég kíki af og til á Moggavefinn til að taka kúrsinn á þvi sem er að gerast. Ég hef um langan tíma haldið að það dygði. En svo er ekki.

Það er nauðsynleg að kíkja einnig á vísi.is og Ruv .is

Þar er þessa dagana ýmislegt sem ekki er á mogganum. Greinilega ólíkt fréttanef hjá þessum miðlum,  en af hverju veit ég ekki.

[Þórhildur Helga Þorleifsdóttir, 14.10.2008 kl. 13:01]

Þetta var nú ansi skemmtileg mynd þessi danska ;)

[Sigþrúður Harðardóttir, 14.10.2008 kl. 22:56]

Nemendur mínir í dönsku í 8.bekk spurðu mig í dag hvað væri uppáhaldstungumálið mitt ...fyrir utan íslensku.

Ég var ekki í nokkrum vafa...