Jónína Rós Guðmundsdóttir

1.4.2008 | 06:41

1. apríl

Mig minnir að þegar ég var lítil upp úr miðri síðustu öld hafi verið frí í skólanum 1. apríl. Það þótti ekki við hæfi að hafa platandi krakka á skólabekk og við völsuðum um bæinn og plötuðum í staðinn... eða er þetta kannski bara minning eins og að það hafi alltaf verið gott veður í skrúðgöngunni á sumardaginn fyrsta Smile . Eins gott að vera á varðbergi í dag - ætli það renni ekki í gegn hjá mér í dag 80 stykki unglingar - mikið væri ég til í að þau kæmu með eins og eitt flott aprílgabb.... Ég ætti að reyna að vera skapandi í hugsun og vekja krakkagrislingana mína með einhverju sniðugu Cool

Dagurinn í dag er þéttsetinn hvers kyns skemmtilegheitum..., kennsla til 15 í dag, þá tekur við undirbúningur fyrir ársfund Fjárafls sem er kl. 17. Á milli er stýrihópsfundur um menntastefnu sem sennilega er að skila af sér til fræðslunefndar. Í kvöld ætla ég svo með Rannveigu og Berglindi Rós á leiksýningu LME Lísu í Undralandi - sem er víst frábær sýning, öllum sem ég hef heyrt í ber saman um það...

Svo er það náttúrufræðipróf hjá Berglindi Rós, þarf aðeins að útskýra fyrir henni muninn á frumeind, sameind, efnasambandi og efnablöndu - finnst þetta aðeins flókið fyrir 13 ára..... og skattaskýrslan, fresturinn rennur víst út á morgun. Mér leiðist örugglega ekki í dag - nú ætla ég aðeins að skjótast í ræktina... og úthugsa aprílgabb Grin