Auðmýkt

Þegar ég var að læra að verða sérkennari fyrir mörgum árum fengum við ýmis gullkorn til að moða úr, ákvað að deila einu með ykkur sem ég held að hafi haft afdrifarík áhrif á lífssýn mína: 

Til umhugsunar

"Vilji ég aðstoða einhvern við að ná settu marki, verð ég að nálgast hann  á því stigi sem hann er og hefjast þar handa.

Þeir sem ekki geta það blekkja sjálfan sig, haldi þeir að þeir geti hjálpað öðrum . Til þess að hjálpa verð ég tvímælalaust að vita meira en hvað viðkomandi getur, aðalatriðið er að ég skilji hvað hann skilur. Geti ég það ekki skiptir engu hve vitur ég er. Vilji ég samt sem áður sýna visku mína kem ég upp um hégómleik minn og hroka og læt dást að mér í stað þess að hjálpa.

Raunveruleg hjálpsemi byggist á auðmýkt gagnvart þeim sem ég vil leiðbeina, þess vegna verð ég að skilja að það að hjálpa er ekki að ráðskast með heldur gefa af sjálfum sér.

Geti ég það ekki get ég engum hjálpað."

Sören Kirkegaard, danskur heimspekingur. – (E.Þ. þýddi)

 

Held að þessi speki eigi afar vel við á vettvangi stjórnmálanna í dag.

Athugasemdir

[Rannveig Árna (IP-tala skráð) 1.3.2009 kl. 14:07]

Auðmýkt er hugtak sem er misskilið í okkar samfélagi. Auðmýkt þykir bera vott um að láta troða á sér, að ganga á rétt sinn.

En auðmýkt er nokkuð sem allir ættu að temja sér. Við komumst lengra á auðmýktinni en hrokanum, okkur líður betur ef okkur tekst að temja okkur auðmýkt og lífið verður léttara.

Að bera skikkju lífsins létt á herðum sér og temja sér auðmýkt fleytir okkur ansi hreint langt á lífsins braut.

Gangi þér vel í dag sem aðra daga Nína mín

[Guðrún Katrín Árnadóttir, 1.3.2009 kl. 18:14]

Ætli þetta sé það fyrsta sem sérkennurum er kennt í námi sínu almennt? Ég féll algerlega fyrir þessum orðum Kierkegard. Hef reynt eftir fremsta megni að hafa þau að leiðarljósi. En auðvita fetar maður ekki alltaf beinu brautina eftir leiðbeiningunum. Það er samt öllum holt að hafa þau að leiðarljósi