Íslenskur vetur

Nú sit ég í góðu yfirlæti á Skólaskrifstofunni á Reyðarfirði - búið að gefa mér kaffi og hringja út og suður til að reyna að finna bílferð fyrir mig yfir Fagradalinn.  Minn gamli góði Avensis á einu drifi þykir ekki góður valkostur í vetrarfærðinni yfir Dalinn - hann fær bara að hvíla sig þar til veður skánar. Ég hef gott af því að upplifa á eigin skinni hvernig það er að þurfa að fara yfir fjallveg til að sinna erindum sínum - sumir þurfa að gera þetta á hverjum degi.  Það er algerlega nauðsynlegt að bora í gegnum fjöll til að  tryggja öryggi og stækka atvinnu- og þjónustusvæði.

Ég er búin að heimsækja 4 af 5 skólum í Fjarðabyggð og hitta mikið af skemmtilegu fólki - spjalla um skólamál, samgöngumál og pólitík og læra mikið. 

Mikið  hefur verið talað um ríg á milli Héraðs og Fjarða - Fjarðamenn segja Héraðsmenn raga við að heimsækja þá - það virðist svo miklu lengra niður á Firði en uppyfir aftur - held að svolítið sé til í því...

Verðum við ekki að sameina sveitafélög á Mið - Austurlandi til að uppræta ríg og horfa á sameiginlega hagsmuni og samlegðaráhrif?  Held að það kallaði afar hávært á samgöngubætur, þegar allt Miðausturland kallaði einum rómi!

Vona að ég komist heim fyrir bæjarstjórnarfund kl. 17!

Athugasemdir

[Rannveig Árna (IP-tala skráð) 4.3.2009 kl. 21:00]

Heyrðu, það eru bara nokkrir dagar síðan ég fór í bíltúr niður á Firði. Verslaði m.a. í Molanum

En auðvitað færi maður miklu oftar ef samgöngurnar væru betri.

[Guðrún Katrín Árnadóttir, 4.3.2009 kl. 23:32]

Ég er búin að segja þetta í tíu ár. það er gott ef fólk er farið að sjá það. Auðvitað á allt Mið-Austurland að vera eitt byggðarlag. Alla vegna á að gera göng þannig að hægt sé að gera það að einu 15 þúsundmannabyggðalagi með 20 mínútna akstri á milli allra staða. Það er hægt með SAMGÖNG.

[Sigrún Jónsdóttir, 5.3.2009 kl. 01:30]

Vona að þú hafir komist heim heil á höldnu