Háskólastúdent

Það er skrýtið að vera ekki að fara að kenna í haust, þetta er fyrsta haustið síðan 1982 sem svona er ástatt fyrir mér, byrjaði að vísu ekki fyrr en í október 1995, átti smá eftir af fæðingarorlofi... Ég hef alltaf hlakkað til og fundist spennandi að fá misnýja nemendur og misný viðfangsefni, held að maður sé í réttu starfi meðan líðanin er þannig.  Viðurkenni að ég hef líka hlakkað til að komast í sumarfrí öll árin

En nú bíða mín ný viðfangsefni sem nema, í framhaldsnámi í sérkennslufræðum . Í haust tek ég þrjá kúrsa og ætla síðan að byrja að skrifa lokaritgerð á vorönninni, vonandi get ég svo lokið þessu námi vorið 2010. Mér fannst stórmerkilegt að skrá mig inn í Uglu í fyrsta sinn í vikunni - er vanari að setja sjálf upplýsingar inn í svona kerfi og sitja í kennarasætinu.  Ég held að þetta verði rosalega hollt og gott fyrir mig sem kennara, akademísk umræða er endurnýjandi og svo tilfinningin að ljúka kafla sem hófst fyrir rúmum tveimur áratugum, að ljúka framhaldsnáminu sem hófst á Hallormsstað haustið 1987. Á árunum 1987 - 1993 var ég meira og minna í námi með fullri vinnu og uppeldi tveggja ungra barna og þegar því lauk með BA gráðu í sérkennslufræðum (þá var ekki til mastersgráða í KHÍ) hét ég því að slíkt gerði ég aldrei aftur.  Hef nú ekki staðið alveg við það því ég tók aðferðafræðikúrs 2002 og eitthvað var ég farin að spá í lokaverkefni á tímabili. En það er frábært að fá tækifæri til að fara í nám á fullum launum og geta einbeitt sér að því af fullum krafti. Mikið skal ég njóta þess.  Á náttborðinu liggja nú Fötlunarfræði eftir Rannveigu Traustadóttur og Aska eftir Yrsu í mismunandi forgangsröð.

Ormsteitið heldur áfram. Í gær var frábær tískusýning þar sem ein af valkyrjum þessa sveitafélags sýndi þorrablótskjólana sína síðustu þrjátíu árin, allir heimahannaðir og að sjálfsögðu heimasaumaðir.  Síðan voru tónleikar með Ragga Bjarna í gærkvöldi - hann er alltaf sami töffarinn, a.m.k. úr þeirri fjarlægð sem ég var frá honum  og röddin ótrúlega lítið farin að gefa sig.  Við Eydís skemmtum okkur konunglega og settumst svo aðeins inn á Nielsen á eftir og spjölluðum, það er frábært að hafa svona mikið líf í bænum, þyrftum að hafa sleitulaust ormsteiti....Í dag er dagur eldri borgara í tjaldinu og síðan allsherjar partý í kvöld...

Svo er það auðvitað handboltinn..., leikurinn milli Frakka og Króata er að byrja - ætla að hlusta á hann í útvarpinu á meðan ég bregð mér í húsmóðurgírinn og dansa við moppuna í léttri helgartiltektarsveiflu... Þá get ég með góðri samvisku sest niður og æst mig verulega í leik Íslendinga og Spánverju um hádegisbilið.

Athugasemdir

[Dandý (IP-tala skráð) 22.8.2008 kl. 14:20]

ég vissi varla 9+3 eftir spennu leiksins en  fann mig aftur..  

mig langar að læra hjá þér.. hvernig geri ég það ?

[Sigþrúður Harðardóttir, 22.8.2008 kl. 14:51]

Gangi þér vel í skólanum og njóttu þess!

Áfram Nína!

Áfram Ísland!!!

[Guðrún Helgadóttir, 22.8.2008 kl. 16:14]

já njóttu þess að vera skólastelpa á ný og vonandi verða fráhvarfseinkennin frá kennslunni ekki alveg voðaleg. Ég hef lifað eitt haust undanfarin ár án þess að vera að taka á móti nýjum og gömlum nemendum, semja námskeiðslýsingar, fyrirlestra, verkefni og allt það - og það var mjög skrýtið. Mér fannst ég eiginlega svolítið gagnslaus og skrýtið að vera í vinnu sem var í svipuðum takti allt árið um kring.

[Jóna Á. Gísladóttir, 23.8.2008 kl. 11:33]

Dugleg ertu. Njóttu vel.

Ég get ímyndað mér að þú hafir æst þig verulega yfir leiknum í gær

[Lilja Kjerúlf, 23.8.2008 kl. 12:46]

Velkomin í hóp nema við HÍ.....

[Rannveig Árna (IP-tala skráð) 24.8.2008 kl. 09:04]

Gangi þér vel í skólanum gæskan. Mundu bara að núna átt þú ekki að setjast við kennaraborðið